martes, 24 de noviembre de 2009

A provincia de Lugo perderá en dez anos máis de 20.100 habitantes





Só Zamora e Palencia teñen en toda España peor previsión de poboación ata o 2019

As últimas cifras achegadas polo Instituto Nacional de Estatística (INE) sobre proxección de poboación e movementos migratorios son demoledoras para a provincia de Lugo, sendo a máis extensa de Galicia. Segundo estes datos, entre os anos 2009 e 2019 a provincia perderá 20.162 habitantes, mentres que se tomamos como referencia o 2002, a sangría demográfica será de 32.000 lucenses, e iso a pesar de que pasaron os anos de bonanza económica.
Analizando os datos do INE son dous os factores que provocan o descenso de poboación: prevese o dobre de mortes sobre nacementos e falta de inmigrantes. Só o aumento de esperanza de vida amortece a caída poboacional, pero esta situación provoca que a provincia teña cada vez menos persoas en idade activa de emprego e aumenten os gastos de xubilación e de dependencia.
En toda España, só Zamora e Palencia teñen unha porcentaxe de previsión de crecemento poboacional para o período 2009-2018 peor que o de Lugo, situado no -5,83%. En Galicia, a previsión para a veciña Ourense é de -4,97%; para Pontevedra, de -2,63%; e para A Coruña, de -2,09%.
As cifras de nacementos na provincia caerán progresivamente os próximos anos segundo os datos do INE, pasando dos 2.143 habitantes aos 1.765 no 2018; mentres que os falecementos estabilízanse ao longo deste período, contorna aos 4.900 lucenses.
Pola súa banda, as inmigracións procedentes do estranxeiro á provincia están a caer desde os anos 2007 e 2008, cando se produciu o pico de entrada de inmigrantes. A provincia pasou de recibir a 3.421 persoas no 2007, a que este ano entren 1.798 persoas; para o próximo, 1.514; e para o 2011, 1.417. Haberá un pequeno repunte cara ao 2017.

No hay comentarios:

Publicar un comentario