martes, 16 de marzo de 2010

A Deputación de Lugo distinguirá ás empresas que aposten polo turismo e os produtos autóctonos



O presidente da Deputación de Lugo, José Ramón Gómez Besteiro, anunciou este luns a posta en marcha dos distintivos de garantía de calidade LugO2 e Lugo Sabe, que se outorgarán a partir de maio ás mellores empresas turísticas e produtos autóctonos procedentes das tres reservas da biosfera da provincia (Terras do Miño, Os Ancares e Eo-Oscos-Terras de Burón) e da comarca do Courel.

Ao redor de 900 establecementos de carácter rural e máis de 100 produtos dunha trintena de concellos lucenses optarán aos certificados da Deputación, que buscan “xerar riqueza apostando polos recursos naturais e o uso das novas tecnoloxías”. Ambas as iniciativas enmárcanse dentro do programa ambiental da Deputación de Lugo, dotado con 5 millóns de euros (un 70% achegado polos fondos Feder e un 30% pola administración provincial).

Polo momento unha ducia de empresas rurais xa obtiveron estas denominacións logo de participar nun proxecto piloto que levou a cabo o organismo provincial de Lugo nos últimos meses.

Gómez Besteiro destacou que "o obxectivo desta iniciativa é converter ás empresas turísticas e alimenticias da provincia nun referente en España que se traduza en beneficios económicos, á vez que se fomentan as boas prácticas ambientais".

A marca LugO2 está dirixida a establecementos turísticos como hoteis, balnearios, campamentos, casas rurais, restaurante ou comercios. Lugo Sabe amparará produtos autóctonos sometidos a rigorosas prácticas hixiénicas e de control en toda a cadea de fabricación: produción, envasado, embalaxe, almacenamento e distribución.

As empresas LugO2 deben garantir a conexión a Internet, favorecer o emprego de fontes de enerxía renovables, reducir a xeración de residuos, o consumo de luz e auga e incluír medidas encamiñadas á educación ambiental e á sensibilización coa contorna natural. Ademais este distintivo obriga a ser punto de comercialización de produtos Lugo Sabe, de alimentos con denominación de orixe, con IGP ou rexistrados no consello regular de agricultura ecolóxica de Galicia.

No hay comentarios:

Publicar un comentario