viernes, 15 de enero de 2010

O temporal de choiva e vento deixa dous feridos, prolongados cortes de luz e numerosas incidencias en Lugo





O inesperado temporal de vento e choiva que azoutou Galicia na madrugada deste xoves volveu deixar tocadas as instalacións eléctricas da provincia de Lugo, onde máis de 30.000 persoas (ao redor dun dez por cento da poboación) quedaron sen luz. Aínda que Begasa e Gas Natural-Unión Fenosa traballaron durante todo o día por recuperar o servizo, á caída da noite uns 2.500 fogares aínda seguían sen luz.
A situación recordou moito, sen chegar a ser tan tremenda, á ocorrida co Klaus hai case un ano. Precisamente, as primeiras impresións apuntan a que o ocorrido na madrugada foi exactamente o mesmo fenómeno, unha ciclogénesis explosiva.
O vendaval, do que non houbo alerta previa, deixou un rosario de incidencias por toda Galicia. O 112 atendeu unhas catrocentas entre a medianoite e as oito e media da mañá. O peor momento, polo menos na provincia de Lugo, foi ao redor das catro, cando se iniciaron os apagamentos.
O 112 deu conta de caídas de árbores sobre estradas en Monterroso, Friol, Palas de Rei, Guitiriz, Láncara, A Fonsagrada, Lugo, Baralla, O Páramo, Becerreá e A Pobra de Brollón, entre outros. Noutras zonas, as árbores levaron por diante cables de telefonía e de subministración eléctrica.
Na estrada local das Nogais a Nullán, na Montaña lucense, rexistrouse un accidente cunha persoa ferida ao caer unha árbore sobre o seu vehículo. Polo mesmo motivo outra persoa sufriu pequenos danos no municipio de Ribas de Sil.
Na provincia rexistráronse refachos de vento de ata 125 quilómetros por hora, na zona da Montaña. O ocorrido é consecuencia do paso dunha forte borrasca, xa desactivada, á que este venres seguirá outra que puxo en alerta laranxa o litoral da provincia de Lugo.
Os cortes de luz, sufridos en máis de 30.000 fogares, afectaron a numerosas zonas rurais e periurbanas, como é o caso de Calde ou As Arieiras, no municipio de Lugo. Nesta última zona, a luz, que se foi ao redor das catro da madrugada, volveu sobre as seis da tarde. En Calde, onde se recuperou ao redor das nove (dezasete horas despois), no hospital funcionaron todo o día grazas a xeradores eléctricos.
Os cortes foron provocados pola caída de árbores sobre o tendido eléctrico. Gas Natural asegurou que ao redor das oito e media da tarde, dezaseis horas despois de que pasase o peor do temporal, normalizara a subministración eléctrica en toda a provincia, onde se viron afectados cinco dos municipios cubertos por esta empresa. Peor foi a situación no territorio atendido por Begasa, onde uns 30.000 abonados quedaron sen luz.
Pouco logo das oito da noite, Barras Eléctricas informaba de que restablecera o servizo ao 92 por cento dos afectados. En canto aos pouco menos de 2.500 fogares que aínda continuaban sen subministración, a empresa aseguraba que ía traballar de noite para terminar de solucionar as avarías.
No caso de Fenosa, as zonas máis afectadas foron Baralla, Palas de Rei e Guntín. Na zona de Begasa, o foron Castro de Rei, A Pastoriza, Guitiriz, Begonte e Lugo capital.

No hay comentarios:

Publicar un comentario