Galicia perdeu 2.000 habitantes no ano 2010. Así se desprende da estimación de poboación actual do Instituto Nacional de Estadística (Ine), que indica un descenso do 0,7 por cento a 1 de xaneiro de 2011 respecto da mesma data de 2010. A comunidade pasou de 2.738.591 a 2.736.636 persoas no ano que acaba de terminar. A nivel estatal os datos do Ine indican un ascenso do 0,35 por cento, crecendo o número de habitantes ata os 46.152.925.
Por provincias, A Coruña e Pontevedra aumentaron a súa poboación, mentres que en Lugo e Ourense descendeu o número de habitantes. Na Coruña rexistrábanse 1.123.514 habitantes polos 1.125.354 actuais; Pontevedra pasou de 946.431 a 947.435; Lugo sofre un descenso de ao redor de 3.000 habitantes, pasando de 342.758 a 339.793; e Ourense, para rematar, queda en 324.055 persoas polas 325.887 do ano anterior.
Na división por sexos Galicia ten 1.317.910 homes e 1.418.726 mulleres, o que representa 1.055 homes menos e 899 mulleres menos que na mesma data de 2010.
Por idades na comunidade galega, a 1 de xaneiro de 2011, 433.049 persoas --un 15,8 por cento da poboación-- teñen menos de 20 anos, fronte aos 603.761 --22 por cento-- que teñen máis de 65. Ademais, 766.277 persoas --o 28 por cento-- teñen entre 20 e 40 anos e 933.550 --un 34,1 por cento-- teñen entre 40 e 65 anos.
O resto de autonomías en xeral experimentou un aumento da súa poboación. Ademais do xa mencionado caso galego, as únicas que perden habitantes son Asturias, cuns 3.000 cidadáns menos; Castela e León, onde se reducen en preto de 8.000 e A Rioxa, cun descenso que rolda o milleiro, conforme os mesmos datos do Ine.
No hay comentarios:
Publicar un comentario