Cae a natalidade en Galicia por primeira vez desde 2002

Galicia é incapaz de afrontar a grave crise vexetativa que afecta á comunidade desde hai anos, e o balance de 2009 eleva aínda máis o pesimismo. E é que a comunidade galega rexistrou o ano pasado un dobre dato negativo: reduciuse a natalidade (a primeira vez que cae desde 2002) e aumentaron as defuncións.Segundo os datos publicados este martes polo Instituto Nacional de Estadística (INE), Galicia contabilizou o ano pasado 22.646 nacementos e 30.226 falecementos, o que arroxa un saldo vexetativo de -7.580 persoas. Só dúas comunidades están nunha situación similar, Asturias (-4.467) e Castela e León (-6.312), ambas cos mesmos problemas de envellecemento.O primeiro dato preocupante é a cifra absoluta de natalidade. Galicia contabilizou 22.646 nacementos, 529 menos que en 2008. Esta caída racha cunha tendencia positiva que viña rexistrando desde 2002, alentada polo incremento poboacional derivado da inmigración.Os datos do INE indican tamén que o problema vexetativo non se limita ás provincias do interior. A cifra de nacementos reduciuse na Coruña (-186), Ourense (-78) e Pontevedra (-300), e só aumentou lixeiramente na provincia de Lugo, que rexistrou 35 alumeamentos máis.En cifras relativas, a situación de Galicia no conxunto de España segue sendo altamente preocupante. A taxa bruta de natalidade apenas chega aos 8,27 nacementos por cada 1.000 habitantes, só por diante de Asturias e Castela e León. A media en España supera os 10,7 alumeamentos, aínda que este indicador pasa de 12 en comunidades como Madrid ou Murcia.Marca de defunciónsPero á caída da natalidade únese un segundo problema, o incremento das defuncións derivado do progresivo envellecemento que afecta á comunidade galega. Esta situación si afecta en maior medida ás dúas provincias do interior, que están entre as provincias de España coa idade media máis elevada.Galicia contabilizou 30.226 defuncións o pasado ano, a cifra máis elevada da democracia. A diferenza do indicador de natalidade, os datos de falecementos crecen progresivamente e sen freo desde a década dos oitenta. E o panorama demográfico de Galicia indica que esta tendencia non se freará nos próximos anos.Con todo, os datos indican sorprendentemente que as defuncións só aumentaron na provincia da Coruña (case un milleiro máis), mentres que se reduciron en Lugo, Ourense e Pontevedra.A diferenza entre nacementos e defuncións permite obter o saldo vexetativo. En Galicia, Pontevedra é a única provincia que mantén este indicador positivo (325), xa que a cifra de alumeamentos é superior á de falecementos. No lado contrario, as provincias da Coruña (-3.059), Lugo (2.511) e Ourense (-2.335).Natalidade en EspañaNo conxunto de España rexistráronse o ano pasado 492.931 nacementos, mentres que a cifra de defuncións situouse en 383.486, o que arroxa un saldo vexetativo positivo de 109.445 persoas.Con todo, o comportamento varía en función das comunidades autónomas. Seis delas (Galicia, Castela e León, Asturias, Aragón, Cantabria e Estremadura) tiveron crecementos negativos, fronte aos importantes incrementos de Madrid, Cataluña ou Andalucía.