Deputación e Concello presentan o concurso de tapas da Fonsagrada

20/07/2012 - El Progreso Digital (Lugo)

A Deputación de Lugo e o Concello da Fonsagrada presentaron este venres o primeiro Concurso de Tapas da Fonsagrada, que se desenvolverá a vindeira semana, entre o 23 e o 28 de xullo.

A iniciativa, organizada polo Concello e os profesionais fonsagradinos, ten o obxectivo de “potenciar a economía local co impulso da hostalería, o turismo rural e os produtos autóctonos”. Quince establecementos servirán, dende o próximo luns e ata o sábado, de sete da tarde a dez da noite, pratos confeccionados, na súa maioría, con produtos autóctonos a tan só un euro. Os participantes poderán puntualos con uns cupóns que estarán a súa disposición nos locais.

Lara Méndez, vicepresidenta da Deputación, salientou que “administracións, autónomos e pequenos empresarios sumamos esforzos porque sabemos que xuntos somos máis fortes e que xuntos podemos reiventarnos, sacando adiante proxectos que xeren riqueza na provincia coma este concurso”, que definiu como “unha iniciativa claramente económica”.

O alcalde, Argelio Fernández Queipo, agradeceu a colaboración da Deputación “para que o rural siga sendo rural” e destacou que o concurso de tapas é unha boa oportunidade para comprobar que A Fonsagrada “é un referente na gastronomía e nos produtos autóctonos, pois conta con materia prima de primeira calidade”. Incidiu tamén no carácter dinamizador da economía local desta cita, “que dará a coñecer a riqueza gastronómica da Fonsagrada, pero tamén as súa oferta de turismo rural e patrimonio natural”.   

Na presentación, celebrada na praza de abastos de Lugo, tamén participou a concelleira de Cultura da Fonsagrada, Marta Álvarez.