«A Fonsagrada é grande, pero se a xente maior morre, a nova non nace e as fábricas non fabrican... non sei o que vai pasar. ¡Non din que van ter que empezar a parir as mulleres de 80 anos!». Manuel e Ana, e a súa filla Mónica, veciños da Fonsagrada, din asumir con filosofía a situación do municipio tras a presentación por parte de Mariano Rajoy no Congreso dos Deputados dos recortes sociais máis duros da democracia. «Os anuncios que fixo Rajoy [refírese aos do pasado día 11] son catastróficos para A Fonsagrada», explicaba Manolo Fernández no seu negocio. «A suba do IVA vai acabar co comercio da vila e se desaparecen máis prestacións do paro e da dependencia, non sei como van facer os coidadores e a xente maior», advertía.
Cun clima adverso e unha orografía montañosa, A Fonsagrada é terra de xente traballadora e viaxeira. Cóntanse por miles os fonsagradinos que emigraron buscando un futuro próspero, pero sen romper o lazo coa súa terra. A poboación multiplícase no verán e en vacacións por iso. No inverno volve a soidade, xa que a crise económica non devolveu por agora a case ningunha familia á zona.
Protexer ao home
Moitos opinan que a Administración debería «protexer ao home». Para que municipios como A Fonsagrada non morran é imprescindible manter servizos educativos e sanitarios de calidade, e dar facilidades, ou polo menos non entorpecer, aos emprendedores. «Só protexen a natureza, non ás persoas», critica un veciño. «E nin iso fan porque nin limpan nin deixan limpar. Ata botaron uns peixes malos no río que acabaron coas troitas», lamenta José.
No hay comentarios:
Publicar un comentario