lunes, 17 de mayo de 2010

Medio Ambiente desbloquea o plan de abastecemento da Fonsagrada




O Ministerio de Medio Ambiente e Medio Rural e Mariño acaba de adxudicar á empresa Eptisa a redacción do proxecto de mellora do abastecemento de auga da Fonsagrada. A contratación desta actuación é o primeiro paso para solucionar os problemas de subministración que sofren os fonsagradinos desde a rotura da presa do Muradal.

O obxectivo do proxecto é determinar o modo máis adecuado de recoller a auga dos mananciais para fornecer á vila da Fonsagrada. Desde que a presa quedou inutilizada, a auga bombéase desde o río, traballo que entraña grandes dificultades e un elevado gasto enerxético.

Os técnicos de Eptisa teñen un arduo traballo por diante, pois para deseñar o novo sistema de abastecemento de auga deberán ter en conta non só a configuración hidrolóxica das montañas fonsagradinas, senón tamén os condicionantes ambientais para a obra.

Unha vez definidas as características da actuación, a Confederación Hidrográfica do Cantábrico asumirá a obra, seguindo o compromiso adquirido polo seu presidente, Jorge Marquínez, nunha reunión mantida o pasado ano co alcalde da Fonsagrada, Argelio Fernández Queipo.

Fondos
O Ministerio de Medio Ambiente achegará os fondos específicos para a redacción do proxecto e a partida orzamentaria para acometer as obras se detraerá da asignación para actuacións da Confederación Hidrográfica do Cantábrico.

O alcalde da Fonsagrada, Argelio Fernández Queipo, valorou este xoves o paso dado polo ministerio ao adxudicar a redacción do proxecto. Indicou que "é o que estabamos a esperar para realizar as obras".

O rexedor non quixo aventurar cal será a solución que se adopte para suplir a presa do Muradal. Explicou que "son os técnicos os que agora teñen que estudar cal é a mellor opción para mellorar o abastecemento de auga da vila da Fonsagrada".

No hay comentarios:

Publicar un comentario