Nace unha nova asociación para reunir aos fonsagradinos

Un grupo dunhas 120 persoas constituirán oficialmente mañá a Asociación de Amigos e Vecinos da Fonsagrada. O seu obxectivo é pór en contacto a persoas que nazan ou vivido nesta localidade, impulsar actividades para dinamizar o municipio e dar a coñecer o seu patrimonio artístico e natural. A asemblea constituínte da asociación terá lugar mañá, a partir das once, no salón de actos municipal da Fonsagrada. Os seus impulsores esperan que a este acto acudan máis de cen persoas, que posteriormente gozarán dunha comida en común. A este acto oficial de constitución da asociación está previsto que acudan fonsagradinos residentes en distintos puntos de España, entre os que se espera a algunhas persoas que fai 30 anos que non visitan a localidade. Obxectivos A finalidade principal da asociación é fomentar as relacións entre os membros e organizar actividades sociais, artísticas, deportivas, recreativas ou de carácter instructivo. Os promotores do colectivo queren tamén dar a coñecer o patrimonio natural e artístico da Fonsagrada, a través de xornadas nos seus lugares de residencia, organización de visitas ou outro tipo de actividades que axuden a coñecer o municipio de referencia. Entre as súas previsións figura tamén entrar en contacto con outras asociacións da Fonsagrada e co Concello, co fin de colaborar en actividades que organicen. Este grupo de fonsagradinos chega ao momento da constitución oficial da asociación liderado por unha xunta xestora que presidirá ata mañá Lucía Pérez Álvarez, natural da Fonsagrada e residente na Coruña. Este órgano disolverase na asemblea para dar paso á primeira directiva do grupo, que se nomeará no transcurso da reunión. Socios Poden formar parte do colectivo as persoas nacidas na Fonsagrada, aquelas que residan no municipio nalgún momento da súa vida, así como os seus cónxuxes e familiares en primeiro grao. Os estatutos prevén a existencia de socios fundadores, que son os que acudirán mañá á asemblea; socios de número, que ingresarán logo da constitución, e socios de honra, que designará a directiva se o considera pertinente. Os interesados en asociarse ou recibir máis información sobre o grupo poden porse en contacto cos seus impulsores a través do teléfono 981.29.04.80 ou do correo electrónico pedreirajmm@hotmail.com.