O PP pedirá que a ampliación da Rede Natura na montaña se axilice

 

29/01/2012 - Pilar G. Cheda / El Progreso (Lugo)

O Partido Popular presentará unha proposición non de lei no Parlamento galego para pedir que se axilice a aprobación do Plan Director da Rede Natura, que suporá a ampliación do territorio protexido en municipios de montaña como A Fonsagrada, Baleira ou Navia de Suarna.

O alcalde de Baleira, Francisco Acal, e o portavoz do PP da Fonsagrada, Tobías Martínez, reuníronse o pasado venres co director xeral de Conservación da Natureza, Ricardo García Borregón, para coñecer os detalles do programa de ampliación da Rede Natura.

Concluíron que o borrador que baralla a Xunta non será prexudicial para os intereses dos veciños destes municipios e, polo tanto, manifestaron o seu apoio á súa aprobación inmediata. A deputada autonómica Emma Álvarez, que acompañou aos portavoces do PP da Fonsagrada e Baleira, adiantou que o seu grupo intentará axilizar os trámites parlamentarios para que o borrador cobre consideración de texto definitivo.

Se o documento se aprobase, 15.523 hectáreas da serra de Foncuberta consideraranse Lugar de Interese Comunitario e a superficie da Fonsagrada incluída na Rede Natura pasará do 8 ao 39,7 por cento.

Os portavoces populares din que o plan director garante que na Rede Natura fomentaranse as actividades e usos tradicionais en consonancia coas normativas europeas». Indican, neste sentido, que nas zonas definidas como de usos xerais autorizaranse construcións de instalacións agrícolas, gandeiras e forestais ou instalacións vinculadas a estradas ou gasolineiras.

A gradación de zonas protexidas foi un dos aspectos máis criticados polo PSOE da Fonsagrada, contrario á ampliación da Rede Natura, pois asegura que a maior parte do territorio considérase zona de elevada protección e moi poucas hectáreas clasifícanse como de usos xerais.

Os populares insisten en que o PSOE está a difundir «informacións irreais» sobre «unha suposta prohibición para construír», que eles queren desmentir para «tranquilizar aos veciños».

Subliñan que o plan director que propón a Xunta «equipara os usos na zona de conservación e na zona de uso xeral cos permitidos nos sos rurais de protección ordinaria».

CAMBIO DE OPINIÓN Os populares opuxéronse no pleno fonsagradino

O pleno da Fonsagrada acordou por unanimidade un posicionamento en contra da ampliación da Rede Natura por considerar que sería prexudicial para os intereses do municipio. Nesta ocasión, os edís do PSOE, o PP e o BNG apoiaron a moción, que pedía á Xunta de Galicia unha revisión do borrador do plan director. Superficie O argumento dos socialistas era que o 39,7 por cento do territorio da Fonsagrada quedaría baixo as restricións da Rede Natura e non podería beneficiarse das excepcións permitidas para os municipios que teñan máis do 40 por cento da superficie protexida. Reunión O alcalde da Fonsagrada, o socialista Argelio Fernández Queipo, tamén solicitara un encontro con Ricardo García Borregón para explicarlle os seus reparos ao proxecto. Será, previsiblemente, a próxima semana. As opcións que barallaban os técnicos municipais era reducir a superficie afectada ou, no caso de que esta opción non fose viable, ampliala ata o 40 por cento para poder acollerse ás excepcións dentro dos usos permitidos.