O proxecto da Rede Natura non contempla zonas de usos xerais na Fonsagrada

30/01/2012 - Pilar G. Cheda / El Progreso (Lugo) O alcalde da Fonsagrada, o socialista Argelio Fernández Queipo, reiterou onte que o proxecto de ampliación da Rede Natura que baralla a Xunta suporá un grave prexuízo para o municipio porque no territorio afectado non se contempla ningún espazo catalogado como de usos xerais e, polo tanto, as restricións para actividades e construcións serán as máis altas. A proposta de ampliación da Xunta afecta a 15.523 hectáreas da serra de Foncuberta e, segundo o documento inicial, estarían na súa totalidade baixo os niveis de protección 1 e 2, é dicir, os máis restritivos. Aclara así as manifestacións realizadas en días pasados por representantes do PP, que destacaban que nas zonas de usos xerais estarían permitidas as construcións agrícolas, gandeiras, forestais, instalacións relacionadas con estradas ou gasolineiras. Argelio Fernández explica que «a zona de usos xerais é a de menor protección, pero na ampliación que afecta á Fonsagrada non hai nada clasificado dentro dese nivel, todo se inclúe nos tipos 1 e 2». Unanimidade en contra O alcalde da Fonsagrada reiterou a súa postura contraria á ampliación da Rede Natura. «O meu obxectivo é que non haxa ampliación. Esta postura aprobouse non pleno por unanimidade e será a que eu defenda na reunión co director xeral de Conservación da Natureza, Ricardo García Borregón». que se celebrará a próxima semana. Fernández Queipo considera que os territorios afectados pola ampliación «non teñen nada para requirir unha protección especial» e insiste en que «o primeiro que hai que preservar é o home». Argelio Fernández Queipo. (Foto: AEP)  O alcalde da Fonsagrada subliña que «se o medio natural está nesta zona en boas condicións é porque houbo persoas que se ocuparon de que así fose, as aldeas non están integradas na paisaxe, senón que foron as que fixeron a paisaxe». Afirma, neste sentido, que «a xente do rural entendeu hai moito tempo que tiña que conservar a contorna e facer un espazo habitable». Considera que por este labor de conservación «os veciños merecen unha compensación en forma de axudas lineais por territorio afectado polas restricións». Argelio Fernández cre que o actual sistema de protección natural imposto pola Unión Europea non é xusto para os territorios afectados. «u primordial é que a xente poda seguir vivindo non campo e desenvolvendo as súas actividades, se hai diversidade é porque o home está aí, non podemos facer disto un novo Amazonas». O alcalde da Fonsagrada critica que «esta discusión sobre a Rede Natura se leve ó plano político». Afirma que «independentemente do que diga un partido, temos a obriga de defender as mellores condicións posibles para que á xente lle apeteza seguir vivindo aquí, débome ós meus veciños e teño que buscar unhas condicións xustas para eles». REGULACIÓN O PP pide unhas directrices claras e permanentes A deputada do PP Emma Álvarez avanzou que o seu grupo promoverá no Parlamento unha moción para axilizar a aprobación do plan director da Rede Natura. Este documento recolle as directrices de uso dentro de todos os espazos protexidos actualmente ou no futuro. O obxectivo é que todas as institucións e os cidadáns afectados polas medidas de protección coñezan os usos permitidos e as prohibicións que leva a Rede Natura en cada lugar