2/02/2012 - Javier Rivera / El Progreso (A
Fonsagrada)
o butelo,
emblema da gastronomía da Fonsagrada, volve conquistar os padais
de veciños e visitantes este fin de semana con motivo da décimo quinta
feira dedicada a exaltar as súas excelencias. Os amantes deste produto
estaban onte de parabén, porque co frío invernal é cando máis se goza
este manxar que enalteceu os cocidos servidos nos restaurantes da
localidade, sen que o tempo fose un elemento disuasorio para acudir á
convocatoria. A carpa que albergou os postos gastronómicos e artesáns
rexistrou un continuo ir e vir de xente, desexosa de comprar este e
outros derivados do porco. Para hoxe espérase un abarrote aínda maior.
«É máis que unha festa que atrae visitantes e xera vendas.
Serve de punto de encontro para os fonsagradinos que están fóra, trátase
dunha xornada de reunión familiar». Así definía o espírito da Feira do
Butelo Rubén Fernández, xerente da industria cárnica local Casa
Castelao. Trátase dun certame consolidado «que resiste a desconfianza
provocada pola crise e responde ás espectativas». Non ía desencamiñado
na súa apreciación á vista da multitude que visitou o recinto, sobre
todo nas horas punta, entre a unha e as catro da tarde.
Un dos aspectos máis curiosos é a fidelidade de moitos
compradores particulares, que regresan á cita tras adquirir un butelo en
edicións anteriores. «Algúns traen a etiqueta na man para pedir o
produto no mesmo posto que o ano anterior», explica o xerente de Casa
Castelao. Non faltaron tampouco hostaleiros de Lugo e a súa comarca, que
ven no butelo da Fonsagrada un elemento de prestixio para os seus
negocios. «Ao longo do ano temos moitos pedidos de produtos porcinos de
comercios, restaurantes e bares da provincia e de Galicia», resalta
Fernández.
Este prestixio, que transcende fronteiras autonómicas, aséntase
na calidade que lle agrega á boa materia prima o especial microclima
fonsagradino, xunto á experiencia transmitida de pais a fillos na
elaboración de anacos de costela e touciño, embolsados no estómago do
porco ou en tripa grosa, e sometidos a un proceso de afumado durante
varios días, seguido do secado durante dous ou tres semanas.
PREZOS
O prezo de cada butelo, que pesa entre un quilo e quilo e
medio, oscila entre os 8,50 e os 13 euros, segundo sexa de porco branco
ou de porco celta, indica Fernández. O butelo normal adóitase vender a 9
euros o quilogramo «se está feito en tripa gorda», precisa Manuel Pérez
González, de Embutidos Buenavista. Se vai envolvido en estómago de
porco, como se facía tradicionalmente, véndese a doce euros o quilo.
Cada peza pode alimentar a catro persoas.
Aínda que no seu posto están bastante apurados atendendo á
clientela, Manuel detense mostrar un butelo feito con estómago, «cosido a
man e cun pequeno pau de uz que serve de suxeción» e que sobresae nun
extremo.
Manuel Pérez sostén que a Feira do Butelo «vai a máis en cada
edición», con independencia da negativa conxuntura económica, ao que
«axudou moito o tempo desta volta». Ademais de butelo, o seu posto
rexistrou boas vendas de chourizos para cru. «É moi demandado»,
confirma.
INNOVACIÓN
Na carpa hai un posto dedicado exclusivamente ao porco celta
fonsagradino, o da firma Porco Landrán, que non enfoca só a súa presenza
no certame á venda. O seu responsable, Pablo Valledor, insiste na
posibilidade de que visitantes e clientes poidan degustar novos produtos
para coñecer a súa reacción de primeira man. «Quero que o consumidor
final coñeza as nosas innovacións», asegura.
Este ano a súa principal aposta é a ‘mestura de cocido', un
fiambre elaborado cos produtos do porco celta que integran este prato
tradicional e que pretende «converter o cocido en algo intemporal, que
se pode tomar en calquera época do ano como entrante ou aperitivo». O
seu sabor está moi logrado.
Valledor pon especial énfase na elaboración de roxos e
chanfainas de porco celta. «Son manxares cada vez máis esquecidos na
gastronomía. É unha aposta case arqueolóxica que pretende recuperar
aquelas chanfainas feitas co pulmón e o corazón do porco que teñen un
sabor contundente. Son ideais para tomar con fabas de Lourenzá, fritidas
ou á grella».
Porco Landrán desenvolve un proxecto de I+D+i para a curación
de xamóns de porco celta durante un período de tres anos para alcanzar a
máxima calidade. Ademais, comercializa patés de castañas ao mencía, un
produto otoñal moi apropiado para a sobremesa logo de saborear un
butelo.
Non só de butelo aliméntase o home, polo que na carpa, que
volverá abrir hoxe, instaláronse 60 expositores. Venden produtos
tradicionais como queixos, mel, pans e repostería, así como artesanía en
madeira e coiro.
Rosa Quintana: «Hai que valorizar os nosos produtos de
calidade»
A conselleira de Medio Rural e do Mar, Rosa Quintana, resaltou a
importancia de apostar «pola valoración de produtos de calidade como o
butelo, nos que Galicia é moi competitiva». O desenvolvemento deste tipo
de industrias, como a cárnica na Fonsagrada, «son un elemento vital
para evitar a despoboación rural», recalcou.
Quintana destacou o proxecto de I+D que se desenvolve no
municipio para a curación de xamón de porco celta. «Os ensaios sobre
efectos de fermentos nos acedos graxos do xamón van na boa dirección. Os
seus impulsores confían en lograr un produto que compita co xamón
ibérico».
No hay comentarios:
Publicar un comentario