jueves, 1 de julio de 2010

As compañías de telefonía aplican o novo IVE ao consumo de xuño




As facturas de teléfono do mes de xuño de todas as compañías que operan no mercado español chegarán ao usuario co novo tipo de IVE, que se aplica a partir de hoxe. Os servizos de telefonía e Internet pasan a gravarse co 18% (dous puntos máis que ata agora). Neste caso, unha norma do Ministerio de Industria obriga ás compañías a repercutir a nova taxa na factura de xuño. Segundo a lei, o pago realízase a posteriori do consumo, o que en termos legais coñécese por tracto sucesivo ou continuado. é dicir, que as chamadas que se realizan páganse só no momento no que se esixe o pago (cando chega a factura), xa que a empresa tivo que facerse cargo do adianto dos custos que o consumo supoña.
Subida no medio da crise
Algo máis de nove meses despois de que o Goberno anunciase a subida do imposto sobre o valor engadido, os novos tipos -o 18% para a taxa xeral e o 8% na reducida- entran hoxe en vigor. Fano no medio dunha crise que se agravou desde que en setembro a ministra Elena Salgado avanzase a medida como parte dunha estratexia para aumentar os ingresos fiscais. A alza chega despois de que o Executivo decida aplicar un duro plan de recorte do gasto, aburado pola presión para reducir o déficit público.
Ao mesmo tempo, hoxe soben o gas natural, os combustibles e a bombona de butano, que incrementan o seu prezo e repercutirán tamén o aumento do IVE. No caso do gas, a factura crecerá entre un 7% e un 8,1% (segundo tarifas) máis os dous puntos do IVE. A bombona custará a partir de hoxe 12,45 euros, resultado dun incremento do 6,6% do prezo máis o IVE. A gasolina sobe un 6% e o gasoil, un 13,8%.? Desde o principio, distintos sectores empresariais e organizacións de consumidores reclamaron ao Goberno que suprimise ou aprazase a medida. A mediados de marzo, o Congreso rexeitou unha moción presentada polo PP para suprimir o aumento desta taxa. O Goberno gañou aquela votación por seis votos (176 fronte a 170) cos únicos apoios do PNV e Coalición Canaria. Confederacións de comercio, patronais do automóbil e a hostalería, algúns dos sectores máis afectados, continuaron reclamando medidas paliativas para frear os efectos dun IVE máis alto. Tamén os autónomos. Onte, a Organización de Profesionais e Autónomos de Galicia asegurou que a subida «repercutirá no volume de negocio do autónomo e minorará os seus ingresos». As organizacións de consumidores volveron á carga. Desde Facua, o seu portavoz, Rubén Sánchez, advertiu que a subida ten a mesma consecuencia que «unha baixada de salarios», e lamentou que o Goberno non incorpore un tipo máis alto que o xeneral para produtos de luxo». ?
Redondeo
O redondeo -como ocorreu co euro- é outro dos riscos que acompañan á subida. Para Facua, os efectos poderanse apreciar en alzas de prezo paulatinas nos próximos meses. «A curto prazo non afectará tanto, polas rebaixas». Noutros sectores, nos que non inflúe a estacionalidade, os prezos deberían manterse «máis ou menos estables», pensa Sánchez. As asociacións de consumidores reclaman que o Goberno vixíe os posibles pactos de prezos.?
Mal momento
Onte, o presidente da CEOE, Gerardo Díaz Ferrán mostrouse «absolutamente convencido» de que unha subida de impostos non significa máis recadación, «senón todo o contrario». «Non hai que subir os impostos, este é o peor momento para subilos».? As estimacións do Goberno son que a recadación aumente en 5.150 millóns ao ano. «Son unhas previsións prudentes; é fácil ata que sexan superadas», dixo Carlos Ocaña, secretario de Estado de Facenda, esta semana. Onte, a vicepresidenta primeira, María Teresa Fernández de la Vega, lanzou unha mensaxe de tranquilidade: «A subida do IVE vai ter pouca repercusión no peto dos cidadáns». E recordou que os impostos son o instrumento que teñen os Gobernos «para facer fronte a situacións de necesidade».?
Maiores, pensionistas e parados, os colectivos que máis sufrirán o incremento do gravame
O incremento do IVE terá un impacto maior sobre a poboación máis pobre e de máis idade. Afírmano os autores do informe titulado A subida do imposto sobre o valor engadido en España: demasiado cara e demasiado pronto. Advirten que os resultados do seu estudo «confirman o carácter regresivo dos impostos sobre o consumo».
Os economistas desenvolveron o seu traballo sobre modelos de fogares para definir as decisións que toman no novo escenario que expón a subida ás economías familiares. Conclúen que a repercusión varía en función da idade, a renda e a situación laboral dos membros do fogar. «Trátase de establecer que fracción da renda pode destinarse ao consumo e que fracción ao aforro», explica Juan Carlos Conesa, da Autónoma de Barcelona. «En xeral, os pobres teñen pouca renda e destinan case toda ao consumo; os ricos teñen moita renda, e poden destinar parte ao aforro», di.
Por franxas de idade
O estudo conclúe que a carga tributaria que soportarán tras o IVE no 2010 os fogares con maiores de 61 anos crecerá un 5,2% respecto ao ano anterior; mentres que en unidades con membros de entre 41 e 60, a carga incrementarase nun 1,3%, e nos fogares menores de 41, subirá un 0,3%.
Os impostos sobre o consumo supoñen unha proporción maior da tributación dos maiores, indica o estudo. «Se teño 40 anos e grávanme o consumo, podo decidir canto destino a consumo e canto a aforro; pero se teño 60, as decisións sobre o meu aforro xa as tomei», sinala Conesa.? En canto á carga fiscal en función do nivel de renda, aumenta máis a dos pobres que a dos ricos, porque «a distribución do consumo é menos desigual que a da renda» e os impostos «supoñen unha maior proporción da tributación dos fogares pobres».

No hay comentarios:

Publicar un comentario