miércoles, 28 de julio de 2010

As farmacias fonsagradinas demandan a implantación da receita electrónica


Os farmacéuticos da Fonsagrada reclaman ao Sergas que implante con moita brevidade a receita electrónica no concello. Argumentan que os veciños se aforrarían así desprazamentos para recoller os seus medicamentos, algo que ven necesario nun municipio como o fonsagradino, dado o envellecemento da poboación e a súa dispersión.
Segundo explica un dos farmacéuticos da vila, Manuel Barreira, o sistema actualmente en vigor é un mixto, a receita electrónica en papel, que fai que os veciños teñan dez días de prazo desde a data de expedición da receita para coller os seus medicamentos. En cambio, coa receita electrónica poderían recollelas nun prazo de 30 (desde dez días antes e ata vinte días logo de devandita expedición). Ademais, o médico podería prescribir un tratamento a máis longo prazo.
Barreira explica que, na práctica, como no concello hai moita xente maior que necesita tomar varios fármacos á vez e as caixas dos mesmos esgótanse a distintos ritmos, isto provoca que, en bastantes casos, estes veciños teñan que visitar varias veces á semana a farmacia co actual sistema de transición, mentres que coa receita electrónica «pura e dura» sería suficiente con acudir unha ou dúas veces ao mes.
«Hai moita xente sen coche que vive en parroquias alonxadas e que ao mellor ten que pagar cada dous días 30 euros de taxi para coller un fármaco que custa dez», afirma.
DÚAS VELOCIDADES
Manuel Barreira conclúe lamentando que haxa «unha receita electrónica de dúas velocidades, a de Primeira División e a de Rexional Prefernte, e aquí hai a segunda delas».
A dona da outra farmacia da Fonsagrada, Catalina Ortiz de Galisteo, coincide con Barreira nos argumentos para pedir a receita electrónica e engade, ademais, que no seu local tamén recibe queixas dos veciños porque o actual sistema obrígalles a revisar continuamente a caducidade da receita de cada fármaco para saber cando deben ir recollelos, o que lles resulta complicado pola súa elevada idade e porque moitos viven sos e non teñen quen lles axude.
Tras sinalar que xa se trasladaron as queixas veciñais ao colexio provincial de farmacéuticos para que as transmita ao Sergas, Ortiz de Galisteo lamenta que non haxa unha data fixada para o cambio do sistema provisional á receita electrónica pura.
A farmacéutica, que cre que parte dos problemas residen en que non se explicou ben á cidadanía o funcionamento do novo sistema, lamenta que, de novo, a gran prexudicada sexa «a poboación dá zona rural».

No hay comentarios:

Publicar un comentario