Cousas que se din: MES DE MARZO

MARZO CHUVIOSO, VRAN CALUROSO
Marzo é un dos meses aos que máis ditos e refráns se lle adicaron ao longo do tempo, quizais tamén porque é unha época importante para calquer tipo de cultivo. Ademáis, é o comezo da primavera, e eso, supoño, nótase ata na literatura popular.Non vou estender este artigo inzado de ditos do marzal, posto que sería demasiado longo e aburrido. O que si me gustaría, é apuntar algunhas curiosidades:* Unha delas é o feito de que existen para este mes unha serie de ditos cunha mesma sintaxe, e que para outros meses non se dan, cando menos non con tanta intensidade. Tal é o caso de

• Marzo, igualalarzo.
• Marzo, iguarzo. Refírense estes dous primeiros ao equinocio.
• Marzo, espigarzo. Refírese á saida das primeiras espigas.
• Marzo, pelarzo.
• Marzo, raparzo. Este e o anterior, refírense á rapa das ovellas, que se comeza nesta época.*

Tamén existen unha boa chea de ditos que unen a marzo co viño ou coa feitura do viño:

• O que poda en marzo, vendima no regazo.
• O que en marzo non poda a súa viña, perde a vendima.
• A viña do bo amo, pódase en marzo;
• a viña do ruín, pódase en abril.
• Se no marzo oes tronar, prepara as cubas e o lagar.
• Ben lle irá ao borracho se trona en marzo.
• Marzo, marzal, deixame o viño trasegar.
• Marzo, rodriga feita.
• Viño de marzo, lévao a vella no regazo.*

E ademáis varios ditos relacionados cos paxaros:

• Se marzo se vai e o cuco non veu, ou ven a fin ou o cuco morreu.
• Entre marzo e abril, se non ven o cuco, quer vir a fin.
• Se en marzo non canta o cuco, nin en abril a bubela, e a rula non rulea, mala colleita se espera.
• De marzo á mitá, a anduriña ven e o tordo vai.
• San Raimundo trae a anduriña do outro mundo.*

E para rematar, existen unha serie de refráns que falan da variación do tempo ao longo dos días de marzo, por exemplo:

• Día de marzo, entra rindo e sai chorando.
• Marzo marzán, pola mañá cariña de rosa, e pola tarde cara de can.
• Marciño, marcexán, pola mañá cara de can, ás doce sol da raiña, e á noite pela coma unha fouciña.
• Marzo engañador, un día malo e outro peor..